Grænir stjórnmálamenn og lobbýistar

Nú virðist sem umhverfismálin ætli að verða vendipunktur í kosningum og hefur hver flokkurinn á fætur öðrum tekið þessi mál upp á sína arma í því augnamiði að lyfta fylgi síns flokks. Stjórnmálamenn keppast um að vera hver öðrum grænni, en samt vilja fáir vera þekktir fyrir að kenna sig við flokkinn sem átt hefur græna litinn í gegnum tíðina, Framsóknarflokkinn.

 

Frambjóðendur allra flokka fengu nýverið sent heim að dyrum manifesto frá einum öflugustu lobbýistasamtökum Íslands fyrir þessar kosningar, en þar er tilvonandi stjórnmálamönnum boðið að skrifa undir sáttmála Framtíðarlandsins um framtíð Íslands og gerast þannig grænir stjórnmálamenn. Fyrr í vetur ákváðu þessi sömu samtök að gerast ekki pólitísk samtök. Upp frá Framtíðarlandinu hefur hins vegar stjórnmálaflokkurinn Íslandshreyfingin sprottið sem skipuð er að einhverju leiti af sama fólki og situr í stjórn Framtíðarlandsins og hefur svipaðar málefnaáherslur. Þetta ætti ekki að koma neinum á óvart að til verði öflug lobbýistasamtök sem styðja við ákveðna stjórnmálaflokka. Stjórnmálamenn hefðu getað gefi sér þetta um leið og þeir samþykktu lög um fjármál stjórnmálaflokkanna. Ef eitthvað er þá er líklegt að fleiri slík samtök muni spretta upp til hliðar við stjórnmálaflokkana á næstu árum.

Það sem er varhugavert við þessa þróun er stjórnmálaflokkarnir eru nú að mestu leiti á framfæri ríkisins og hafa því úr takmörkuðu fjármagni að spila og geta því átt erfitt með að etja kappi við lobbýistasamtök sem hafa ótakmarkað svigrúm til auglýsinga og lobbýisma. Með þessu er ekki verið að segja að setja eigi reglur um fjármál félagasamtaka líkt og stjórnmálaflokka, einungis er verið að benda á þennan fylgifisk laga um fjármál stjórnmálaflokka, sem mun að öllum líkindum verða meira ráðandi í umræðunni á komandi árum.

 

Athugasemdir

[Kristín Hrefna, 25.3.2007 kl. 22:45]

Góður pistill sem á brýnt erindi í umræðuna!

[Auðun Gíslason, 25.3.2007 kl. 23:14]

Mér finnst þetta nú óttalegt bull, hef meiri áhyggjur af fjáraustri stórfyrirtækja í stjórnmálamenn og flokka. Nú, að ég tali ekki um innheimtuaðferðir Sjálfstæðisflokksins, sbr. lýsingu Sigurðar G. Guðjónssonar á heimsókn fjáheimtumanna flokksins og skrifstofu Stöðvar2!

[Sveinn Ingi Lýðsson, 27.3.2007 kl. 22:25]

Hvað hefur breyst, hafði framsókn ekki alltaf Sambandið sem bakhjarl, Sjálfstæðisflokkurinn innheimti tíund sína af heildsölum, skipafélögum og iðnrekendum, kratarnir og kommarnir gengu í sjóði verkalýðshreyfingarinnar?  Mér ekki farið að förlast svo minnið.  Stjórnmálaflokkar verða að eiga bakland líka fjárhagslegt, annars eru þeir ekki neitt neitt.  

Það er alveg sama hversu miklar reglur verða um fjármál stjórnmálaflokka.  Það eru og hafa alltaf verið leiðir til að komast framhjá þeim.  Að halda annað er barnaskapur.